Tysdag vart 112 nye elektriske bussar sett i trafikk i Bergen. Av desse er 102 produsert i Yutong-fabrikken i Zhengzhou i Kina, medan dei andre, som er trolleybussar er produsert i Polen av Solaris.

Fylkesordførar Jon Askeland (Sp) seier i kommentar til Nrk at dei kinesiske bussane gjer all kollektivtransport i Bergen fossilfri. Klima- og miljøbyråd Eline Haakestad (MDG) er også nøgd med bussane og seier klimagassutsleppa vert kutta med 85 % i forhold til dagens nivå.

Dei helelektriske og stillegåande bussane er av typen Yutong E-12 og E-15. Dei er alle utstyrt med setebelte og USB-lading for smarttelefonar og duppedittar.

Yutong er har blitt verdas største bussprodusent, og har marknadsandel på 32 % i Kina. Dei leverer elektriske bussar til fleire land i Europa, Asia og Latin-Amerika.

Det var transportselskapet Keolis som vart tildelt busskontrakten for Skyss sin rutepakke i Bergen sentrum for 2020-2030. Kontrakten har verdi på 3 milliardar kroner.

Dei kinesiske Yutong-bussane skal køyre 27 ruter i Bergen sentrum og vert lada om natta på Mannsverk, der ladestasjonen kan lade 91 bussar på same tid. Sjølve ladinga skal ta 5-6 timar, og let kvar buss køyre inntil 10 timar i strekk.

Kvar buss som vert skifta ut frå diesel til straum sparar 50 tonn CO₂ i året.