(Grunnleggjar Jensen Huang. Foto: Nvidia. )
Nyleg gjekk eit bilete verda rundt på sosiale medium med ein påstand som høyrest ut som science fiction: Nvidia er no verdt meir enn bruttonasjonalproduktet (BNP) til kvart einaste land i verda – bortsett frå USA og Kina.
Og sjølv om økonomar ofte seier ein ikkje skal samanlikne eple og appelsinar (eller aksjeverdi og statsbudsjett), er bodskapen klar: Teknologigiganten har vakse seg til ein økonomisk supermakt.
Ein børsvinnar utan sidestykke
For berre få år sidan var Nvidia mest kjent blant gamarar for å lage kraftige grafikkort. I dag er dei sjølve motoren i den digitale revolusjonen. Grunnen er enkel: KI (kunstig intelligens).
Alt frå ChatGPT til avanserte sjølvkøyrande bilar treng enorme mengder reknkraft. Nvidia sit på teknologien som leverer denne krafta. Dette har sendt aksjekursen til himmels og gjort Nvidia til eit av verdas aller mest verdifulle selskap, med ein markedsverdi som no snusar på utrulege 61 380 milliardar kroner.
For å setje talet i perspektiv: Tyskland, den største økonomien i Europa, har eit årleg BNP på rundt 58 590 milliardar kroner. Det betyr at dersom du kunne «kjøpt» heile den tyske økonomien – alt dei produserer av bilar, maskiner og tenester på eit år – ville du framleis hatt pengar til overs om du heller selde alle aksjane dine i Nvidia.
Her er korleis «Nvidia-land» plasserer seg på verdstoppen:
1. USA: 348 100 mrd kr.
2. Kina: 224 100 mrd kr.
3. Nvidia (Marknadsverdi): 61 380 mrd kr.
4. Tyskland: 58 590 mrd kr.
5. Japan: 47 090 mrd kr.
31. Norge: 6450 mrd kr.
Kvifor veks dei så fort?
Nvidia har lukkast med noko som er svært sjeldan i næringslivet: Dei har fått monopol på framtida. Ved å utvikle maskinvare og programvare som er skreddarsydd for å trene store språkmodellar, har dei blitt uunnverlege for alle dei andre teknologikjempene. Google, Microsoft og Meta står alle i kø for å kjøpe brikkene til Jensen Huang.
Når eit enkelt selskap blir så dominerande, reiser det viktige spørsmål. Er vi i ferd med å sjå ei verd der teknologiselskap har meir makt enn nasjonalstatar? For investorer har Nvidia vore ein draum, men for verdas økonomi er det eit teikn på kor ekstremt sentralisert den teknologiske utviklinga har blitt.
Uansett om ein ser på det som ei boble eller starten på ein ny tidsalder, er éin ting sikkert: Den svarte skinnjakka til Jensen Huang er i ferd med å bli det mest kraftfulle symbolet på moderne kapitalisme.