Landsrådet for Heimevernet, som representerer eit breitt spekter av organisasjonar, gir full støtte til regjeringa sitt initiativ om å revidere Forsvarssatsinga.
Etter eit viktig møte på Heistadmoen har rådet samla seg om eit tydeleg framtidskrav: Styrking av Heimevernet med auka kapasitet innan både mannskap og droneteknologi.
Les også: Landmakt: Med fjellene som våpen
Med den auka uroa i Europa og stigande kostnader i forsvarssektoren, er rådet samstemt om at ein revisjon av Langtidsplanen for Forsvaret er heilt naudsynt. Heimevernet, med si unike lokale kunnskap og tilstadevere, spelar ei avgjerande rolle som ein bærebjelke i nasjonal tryggleik og beredskap.
Landsrådet understrekar at Heimevernet er ein sentral del av det norske Forsvarsløftet. Med hovudoppdraget om å vareta territorielt ansvar, sikring av kritisk infrastruktur og bidrag til totalforsvaret, er ei styrking essensielt.
Planen om å auke HVs styrke frå 40.500 til 45.000 fullt utrusta soldatar får full tilslutning.
Landsrådsleiar Are Tomasgard (LO) er klar i sin tale:
– Det er heilt avgjerande at Heimevernet og Forsvaret for øvrig, har dei kapasitetar og den uthaldssemd som er nødvendig for å stå i ei krise eller krigssituasjon. Dette initiativet er eit viktig steg mot å sikre dette.
Krev auka uthaldssemd og moderne verktøy
På bakgrunn av den nye tryggingspolitiske situasjonen, peika Landsrådet på to særleg viktige område for framtidig utvikling:
- Auka mannskapsreserve for uthaldssemd: Nestleiar Jon Kristiansen (NHO) understreka behovet for å ha kapasitet til å stå i ein langvarig situasjon. «Me må ha kapasitet til å «stå i det»,» seier han, og peiker på at etterfylling av mannskap er avgjerande for å oppnå auka uthaldssemd.
- Rask utvikling av dronekapasitetar: Landsrådsleiar Tomasgard (LO) la vekt på at Heimevernet må moderniserast med høgteknologisk utstyr. «Me treng både dronar, og kunnskap om offensiv og defensiv bruk av desse. Dette hastar,» seier han.
Kravet frå Landsrådet er eit tydeleg signal om at Heimevernet er klare til å ta større ansvar, og at dei ser eit stort potensial for å styrke Forsvaret gjennom auka investeringar i både folk og teknologi. Den samla stemmen frå Landsrådet sikrar at fokuset på eit robust og moderne Heimevern vil stå sentralt i den kommande revisjonen av Forsvarsplanen.